|
المدينة الصبح بدري
المدينة الصبح بدري
الشوارع لسّة فاتحة
والمدارس لسّة فاتحة
المحلات..
والحواري
والمجارى
بلكوناتها.. بواباتها
والعيون لسّاها فاتحة
في المدينة الصبح بدري
في المدينة الصبح بدري
العجل ساير وداير
والسجاير..
مالية قلب الميكروباص
والكتب فوق رجل فاطمة
والعينين مليانة ناس
والحناجر لسة عتمة
والإيدين..
بتجس نبض الأمنيات
في المدينة الصبح بدري
في المدينة الصبح بدري
تسبق الرجلين طريقها
والشوارع مش ملاحقة
مــش مـوافــقــة..
والطريق مع إنه واضح
هاجس المجهول مقاوح
واللي جاى مع اللي رايح
كـلــه ســايــح..
فى المدينة الصبح بدرى
في المدينة الصبح بدري
العصافير من كرمها
لسه بتزقزق وتسرح
رغم دخان المصانع
والعوادم والتراب
رغم تلاجة مشاعر
طالعة من ورا ألف باب
إنهيار ساقع وهادى
لحكايات عمالة تجرى
واغتيال الصبح عادى
في المدينة الصبح بدري
|
1
Tags
You must be logged in to add tags.
Writer Profile
Omar Mostafa
This user has not written anything in his panorama profile yet.
|
Comments
You must be a TakingITGlobal member to post a comment. Sign up for free or login.
|
|