اليوم أعلن البرادعى ما كنا ننتظره من زمان , اليوم اعلن قائمه بالمطالب المصريه للتغيير.

• إنهاء حالة الطوارئ.
• تمكين القضاء المصري من الرقابة الكاملة علي العملية الانتخابية برمتها.
• إشراف من قبل منظمات المجتمع المدني المحلي والدولي.
• توفير فرصة متكافئة في وسائل الإعلام لجميع المرشحين وخاصة في الانتخابات الرئاسية.
• تمكين المصريين في الخارج من ممارسة حقهم في التصويت بالسفارات والقنصليات المصرية.
• كفالة حق الترشح في الانتخابات الرئاسة دون قيود تعسفية اتساقاً مع التزامات مصر طبقاً
• للاتفاقية الدولية للحقوق السياسية والمدنية، وقصر حق الترشح للرئاسة علي فترتين.
• الانتخابات عن طريق الرقم القومي.

هذا الرجل يثبت بما لا يدع مجالا للشك أنه رجل عادل و محترم و الاهم محنك سياسيا الى أقضى درجه... فالرجل جاء الى مصر بعد سنين من العمل الدولى ينشد التغيير و فى جعبته ادوات لم يتصور النظام المصرى وجودها من الاساس... انعش فى المصريين حلم التغيير.

سأرجع الى الوراء قليلا لأتلمس طريق البرادعى منذ البدايه و اوضح النقاط التى اوصلتنى للاستنتاج السابق.

اولا كانت الارهاصات فى الصحافه المصريه على من يتولى منصب الرئيس و طرحت اسماء كثيره منها على سبيل المثال لا الحصر عمرو موسى و احمد زويل و عمر سليمان و البرادعى ... و تبعها مبادره من شباب حزب الوفد لدعوه البرادعى ليترشح عن حزب الوفد و ينضم للهيئه العليا للحزب و ذلك فى منتصف العام الماضى ... و قامت صحيف الدستور بعمل تغطيه اعلاميه جباره عن الدكتور محمد البرادعى و الذى كان مجهولا لدى الكثير من المصريين ... فى هذا التوقيت كان البرادعى يعمل فى الوكاله الدوليه للطاقه الذريه و هو ما منعه من ان يؤكد او ينفى هذه الدعوات او نيه ترشحه.

عندما انتهت فتره رئاسته للهيئه اعلن البرادعى انه مستعد للترشح إذا توافرت عده شروط و ملخصها تهيئه المناخ السياسى لانتخابات ديمقراطيه بحق و نزيهه تحت الاشراف الدولى... و أعتقد الكثيرون من المعارضه وقتها ان البرادعى يعتذر بشكل دبلوماسى و محترم عن الترشح و لكن الرجل قال انه سوف يعود الى مصر و يعمل على التغيير ... و على هذا الاساس دشن الشباب مجموعات عديده على الانترنت لتأييد البرادعى فى مطالبه بل وصل الامر ان قام البعض بعمل توكيلات رسميه للبرادعى لتغيير الدستور المصرى.

و فى مجامله (لا أتوقع انه تم طلبها) قام صحفيو النظام بالهجوم على البرادعى بحجج مختلفه منها انه عالم متناسسين تاريخه الطويل فى العمل السياسى الدولى و منها انه عميل لأمريكا متناسيين رفضه لقرار الحرب على العراق و تنديده بحيازه اسرائيل لأسلحه دمار شامل ... و منها انه كان الاخير على دفعته متناسيين تعيينه فى وزاره الخارجيه ... و حجج كثيره واهيه .. فالرجل الصراحه جبار و سيرته الذاتيه مستحيل تكراراها بسهوله و الادهى انه من عائله عريقه توارثت النضال لصالح الشعب فوالده الذى كان نقيبا للمحامين وقف امام السادات اتمريره قانون العيب و هو مما اسفر عن تنحيته من منصبه كنقيب للمحامين.

كان البرادعى و مازال امام هذه الهجمات هادئا و صامدا و مترفعا عنها ... و هو ما اثار استياء البعض من انه فعلا لا يعرف شيئا عن الاوضاع المصريه و انه لا يستطيع اللعب بمفاتيح السياسه المصريه .. و لكن هدوءه اسفر عن عاصفه من التصريحات و التى جائت من خلال ثلاثه لقاءات تلفزيونيه مررها النظام بأمل ان تنكسر شعبيته, فلقاءه مع احمد المسلمانى و وراءه عمرو اديب ثم منى الشاذلى كانوا كفيلين رغم الهجوم القاسى من منى الشاذلى و عمرو اديب عليه فى تنثبيت شعبيته عند انصاره ... فالرجل يتكلم بهدوء و بطريقه علميه واضحه للغايه .. نعم هو يكرر مطالب المعارضه و لكن اسلوبه منمق و مهذب للغايه و بعيد عن الشخصنه.

و فى المقابل قامت الجماهير بأستقباله اروع استقبال فى الطار لم يفسده إلا التزاحم الشديد لحظه وصوله .. كما ان الكتابات التى سبقت وصوله مهدت لاستقباله بهذه الكيفيه .. فعلاء الاسوانى بالذات و هو من اكثر كتاب مصر شعبيه و مصداقيه فى سلسله من مقالاته شجع المصرييت للالتفاف حول البرادعى كرمز للتغيير.

و كما تقول الحكمه اطرق الحديد و هو ساخن .. طرق البرادعى على انصار التغيير فعقد لفاءات متعدده فى بيته مع قيادات المعارضه و مع شباب الفيس بوك, بل و ارسل رساله الى انصاره على الفيس بوك فى مشهد يذكرنا باتخابات اوباما فى امريكا موضحا فيها انه يعمل على التغيير اولا ثم سيقرر فى مسأله ترشيحه للرئاسه

ثم اعلن عن الجمعيه المصريه للتغيير و اعلن اليوم تصريحاته بمطالب الجمعيه و بانه سيفتحها لجميع المصريين للانضمام
اصبح البرادعى بلا جدال هو قائد المعرضه المصريه فهو

1- سطالب فعلا بالتغيير و هو ما يتضح فى بيانه السابق عرضه قبل مطالبته بالرئاسه لنفسه و تحديده لفتره الرئاسه بفترتين يوضح نيته الحسنه فى التغيير بجديه و ترفعه عن التقدير الشخصى و الذى لا محاله سيحصل عليه
2- تحديده لجذور المشكله المصريه و هى الحريه السياسيه و التعليم ثم الفقر يوضح بشده منهجه العلمى فى مواجهه مشكلات مصر
3- اختياره لحسن نافعه كمنسق عام للجمعيه يوضح انه فى طريقه لاختيار كوادر جاده و علميه لمساندته فى عمليه التغيير فالدكتور نافعه و هو دكتور فى العلوم السياسيه و المستقل نوعا ما من افضل العناصر و انزهها لمسانده البرادعى فى مشواره
4- تجاوبه من الشباب المصرى بفاعليه يوضح إلمامه بوسائل التغيير فى القرن الحادى و العشرين
5- اعلان تأييده لحق الاخوان فى تكوين حزب سياسى يتماشى مع مناداته بالحريه ... فلهم مطلق الحريه فى تكوين احزابهم و هو ما جعله بذكاء رئيسا توافقيا للمعرضه المصربه

و لكن لازال الكثير من المصريين يجهلون البرادعى ... فالمهمشون و ساكنى العشوائيات يجهلون من هو البرادعى .. ساقى التاكسى و الحلاقين يجهلون من هو البرادعى ... الصنايعيه و الفلاحين يجهلون من هو البرادعى ... و مع هؤلاء ياتى التحدى... كيف يمكن للشباب المصرى التواصل معهم .. كيف يمكن إقناعهم بالبرادعى ... فهؤلاء تأتى ثقافتهم من خلالا الجرائد الحكوميه بالاساس و من التلفزيون المصرى بالدرجه الثانيه ... هؤلاء هم مؤيدى حسنى مبارك و النظام .. رغم انهم اول ضحاياه.

لا زال السؤال قائما ... و لكن لازال الامل كبيرا فالبرادعى الذى استطاع فى غصون ايام ان يجمع حواله شمل المعارضه المصريه... سينجح فى الوصول الى الطبقات الفقيره فى مصر.

لو كنت لازلت تؤمن ان جمال هو افضل من يقود السفينه المصريه ... فكن صريحا مع نفسك هل هذا لان لك مكاسب من وراءه .. ام لأنك فعلا مقتنع .. لو انك فعلا مقتنع بجمال فقد اخذ ابوه ( و هو معلمه) فرصه ثلاثين عاما دمر فيها مصر عن بكره ابيها .. اما لو كان لك مصالح مع جمال ... فربما تعيد حساباتك ... فالشعب المصرى حقا سيقوم بالتغيير .

اما انت .. يامن تؤمن بالتغيير ... هيا معا الى التغيير ... معا سنغير

--------------

الصوره من بلوج الفنان عماد ماهر بعنوان "لن يستسلم"

منذ زمن و تنصحنى أحد صديقاتى المقربين بمشاهده فيلم دليل المسافرين العابرين حول المجرة، هو من إنتاج سنه 2005 و هو من أفلام الخيال العملى الكوميدية للغايه، الفيلم سحكى ببساطه فى أول عشر دقائق ( و بدون حرق الأحداث عن أرثر البريطانى ( العادى للغايه الذى يصحو من النوم ليجد أن بيته و كوكب الارض كاملا سيتم تدميرهم عن طريق كائنات فضائيه متقدمه للغايه لعمل طريق سريع بين المجرات و انه سيموت و لكن صديقه فورد بيرفيكت ( و هو الذى انقذة ارثر فى الماضى من الموت) ينقذه من الموت و يأخذه لسفينه فضاء – نسيت أن أقول أن فورد كائن فضائى هو الأخر- و فى الرحله يكتشف اشياء عديده من سمكه بابل التى تترجم أى لغه للغتك الاصليه الى إجابه السؤال العظيم عن كل شئ بخصوص الحياه و الكون و كل شئ الى سر أعظم الكائنات على وجه الكون – فحقيقه الأنسان هو ثالث أذكى حيوان فى الكون و يسبقه مباشرة الدولفين و هذه المخلوفات العجيبه

رحله أرثر هى الرحله التى يحتاجها كل بشرى ليرفض أوضاعه المزريه و الدوامه التى وضع نفسه فيها ليتمسك بوظيفه ممله أو منزل متواضع أو حتى كوكب صغير يدمرة سكانه لينطلق فى رحاب الكون.

دليل الماسفرين العابرين حول المجرة يقول لك فى أول صفحه بالبنط العريض لا تخاف ... أنصح كل أصدقائى بمشاهده هذا الفيلم

تجدونه كاملا على اليوتيوب هنـــــــا فى أثنتى عشر جزئاً غايه فى المتعه


و الأن اترككم مع التريلر

أخيراً وجدت ما يدفعنى للكتابه مجدداً... إنه هذا الفيلم الرائع لوودى الآن (فيكى.كريستينا.برشلونه) ... إذا لم تكن شاهدت الفيلم فأحذر هذا المقال ربما يفسد قليلاً من متعه المشاهده ... لذا توجه هنـــــــا لتحميل الفيلم من ملف توررنت و من هنـــــــا للحصول على الترجمه و تعالى مره أخرى

الفيلم يحكى قصه فتاتين أمريكيتان (فيكى و كريستينا) يذهبان لقضاء العطله فى برشلونه ... يتسمان بذات المزاج فى تناول معظم امور الحياه ما عدا تصورهم عن الحب فحين تسعى (فيكى) للإستقرار تتجه (كريستينا) للمغامرة و هو ما يظهر فى رد فعلهم أمام الفنان الاسبانى (خوان أنطونبو) و الذى قام بدوره الممثل الاسبانى (جافير بارديم) الذى يتوجه و بشجاعه منقطعه النظير ليدعوهم للذهاب معه فى رحله لمدينه أوفيدو حيث يستمتعون بمشاهده بعض الاعمال النحتيه لفنان صديقه و يمارسون ثلاثتهم الحب سويا!!!... و من هنا تتصاعد الاحداث بين الشخصيات فتقوم علاقات غير متوقعه و علاقات ثلاثيه يذوب فيها تعريف الحب و الجنس و الفن و الجمال سويا لينتج هذا الفيلم الرائع.

أجد صعوبه فى وقف الاسترسال عن قصه الفيلم و لكن بجانب السيناريو الرائه لوودى الآن و الذى رشح عليه لعدد من الجوائز و فاز بأحسن روح فيلم ( و لا أعلم عن هذه الجائزه و لكنها تبدو كبيره) و لكن الرائع بحق هو اداء بينوليب كروز و الذى فازت عليه بجوائز عديده لأحسن ممثله مساعده و التى جاء دورها مليئاً بالحيويه و التألق و الاثارة عن حق مجسده دور الفنانه و الملهمه فمن أول الفيلم و انت تسمع فى الحوار عن ماريا مراراً و تكراراً و لكن لن تراها إلا عند منتصف الفيلم و هو ما اعطى لدخولها إثارة غير عاديه و قد برعت للغايه فى التمثيل مازجه ما بين الانجليزيه و الاسبانيه.

من الطريف ايضا ان نذكر ان الفيلم تلقى تمويل من مدينه برشلونه لتصويره قدرة مليون يورو بعد منافسه شديده ما بين مدينه برشلونه و مدينه كتالونيا لتصوير الفيلم بداخلهم و حقا يستحق الفيلم ما هو اكثر فالرغبه الجارفه للذهاب الى هناك بعد مشاهده الفيلم شديده للغايه لدرجه أننى واثق ان عائدات السياحه الناتجه عن الفيلم وحده كفيله بأن ترجع للمدينه ما دفعته مرات و مرات.

يا ربى لكم هو بسيط هذا الفيلم ، ليس كأمثال أفلامنا التى لابد أن تقول و بعلو صوتها انا أريد أن أقول موعظه، إن وودى الآن إستطاع بمهارة و بفيلم بسيط و بدون تعقيد أن يجعلنى كمشاهد أستمتع بالفيلم و أجلس بعده أدخن سيجارة و أتأمل فيما حواه الفيلم من معانى

و الأن أترككم مع التريلر

و اليكم بعض الروابط

تحميل الفيلم من مواقع تورنت

تحميل الترجمه الى العربيه

الموقع الرئيسى للفيلم

صفحه المحبين على كتاب الوش

تحميل الموسيقى التصويريه

قلبى جاليرى رسومات بالزيت، كل رسمه هى تتويج لعلاقه ...و كل علاقه و لها إطار يحيط باللوحه ، و انا فنان عنده إطارات كثيره... إطارات للصداقه وأخرى للزماله و ثالثه للأخوه و إطار واحد فارغ لحب حقيقى فى الحياه .

كل واحده عرفتها فى حياتى بيننا لوحه مشتركه رسمناها سويا بألوان كتيره، مثل اللون الأزرق لمكالمه حلوه و اللون الأحمر لتحدى لذيذ و جميل و لون أصفر لحضن أخوى فى لحظه أشتياق و لون أخضر لشغل عملناه سويا و لون أبيض للحظات أعتراف على الأم أس إن

كل لوحه بعد ما نرسمها سويا أبدأ أدور لها على إطار يتلائم معها ، أول حاجه أُجربها هو الأطار الوحيد للحب الحقيقى ، أراه أيتناسب مع اللوحه أم لا يتناسب، هل يقدر أن يغطى على ثقوب الأطارات اللى فاتت و يحتويها، هل يشمل اللوحه كلها و أم سيمحى منها جزء مهم من الرسمه ، ساعات كثيره اترك رسومات من غير إطارات خالص، أستمتع بتجربه الاطارات مره تلو الأخرى ، بلا أدنى ذرة من الخداع و فى حالات كثيره أضع إطارات الصداقه كتتويج للوحه جميله من اللحظات و المشاعر.

انا أرى كل إطار كحاله فى حد ذاتها غير متكررة ... يعنى صداقتى مع أميره لا يمكن تكون هى صداقتى مع ديمه رغم إن الأثنين صداقه، و لكن كل واحده منهم لها الوان مختلفه اترسمت بها اللوحه معاهم و حتى لو وجدت التى ارسم معاها لوحه الحب الحقيقى .... أكيد لن أنسى اللوحات الثانيه التى رسمتها.

الغرض ... انا لست إلا صاحب إطار فارغ أبحث عمن تملأه بأبتسامتها ، و ساعتها سأرسم لها بالوان الربيع فرحه تركى للسجائر ... و غسيل الصحون سوياً ... و إنشغالى بأسعادها ... و ساحرص على إستدامه بريق الإطار.

أفتكر أن مرة أعترضت ... و مرضيش الموظف على الشباك انه يدينى تذكرة إلا لما ادفع التبرع .. و سلمت أمرى الى الله و قبلت الموضوع على مضض على أنه أحد أشكال القهر اللى كلنا متعودين عليها ... و قولت فى نفسى أهو قهر هيروح لحد محتاجه .. أحسن برضه من التبرع الاجبارى اللى بدفعه لكشك السجائر غصب عنى كل مرة أجى أشترى علبه سجاير... انا و الراجل عارفين إنها بأربعه جنيه و ربع و هو بياخد منه لنفسه كده أربعه و نصف ... أو النص اللى بيضاف اوتوماتيك على كروت الشحن أى كان فئتها ... حتى لو الشركه قالت أن الكروت بتتباع بالسعر المكتوب عليها.

أنهارده بقى حصلت فى حياتى نقله نوعيه ... كنت رايح القاهرة و رحت أحجز قطر الصبح ... كان معايا فوبو صاحبى ( فاكرينه اللى كان فى بوست الهرم المقلوب ... معلش مكتبتش عنّه كتير اصله كان مسافر الامارات و لسه راجع و كنا بنفتكر أيام الشتا الحزينه ) المهم انا و فوبو رحنا نحجز القطار و انا سالت واحد من اللى واقفين ... هى بكام التذكرة أسبانى درجه تانيه مكيف ... قاللى 29 جنيه ... يعنى قول 30 بالتبرع .... انا قولت .. أااه التبرع الاجبارى أياه ... و رحت فاتح فى قضيه الجبر و الاختيار و الحق و الحريه فى التبرع و خلافه ... فوبو بكل بساطه .. قاللى ماتطلب أنك تاخد الجنيه و ده حقك .. عادى يعنى ... انا فى سرى قولت تلاقيه لسه مرجعش كلّه من الامارات ... أديت للموظف 30 جنيه و قولتله انا عايز الجنيه الباقى ... قام باصصلى و ضاحك و اداهوللى .. كده بكل بساطه ... ياسلام ... أيه الحلاوه دى

أكتشفت أن انا بقالى أكتر من عشر سنين مضايق من حاجه تافهه و من حقى أن انا أطالب بيها و معملتش كده و لما طالبت بحقى ... أخدته ... الموضوع مفهوش كميا ... انا أخدت حقى لما طالبت بيه

خرجت و الجنيه الفضه اللى فى جيبى عامللى حاله إنتعاش ... حاله من الحريه و الانتصار ... وقفت تاكسى ( انا برضه من الحاجات اللى بتخنقنى هى المساومه مع التاكسيات على الأجرة نتيجه طبيعيه لأنقراض العداد) سالت السواق من الاول ... كام ... قاللى سبعه جنيه ... ركبت على طول من غير فصال

أصل الطبيعى لما تيجى تركب تاكسى من عند محطه القطار لازم التاكسى يبتدى معاك برقم مقفول كده ... زى عشره جنيه ... خمستاشر جنيه ... فتبتدى تساوم و توصلها لغايه سبعه أو تمانيه ,, بس الراجل ده جاب من الاخر و قال السعر اللى تحس أنه محسوب بالتنتوفه ... يعنى مثلا لو كان قال حداشر جنيه و نص ... مكنتش اتكلمت برضه

ركبت التاكسى انا و فوبو ... و اتكلمنا فى السكه عن الجنيه اللى أسترديته و عن الحق فى حريه التبرع ... و وصلنا الراجل و أخد أجرته و فوقيها نفس الجنيه التبرع اللى كان ممكن يروح بالعافيه لحته تانيه حمرا ... و روحت و انا فى مزبرنشق سعيد

لو عندك قدرات شريره ... تامريه عملاقه .... بتمارس أحلام اليقظه .... متصور إن اليهود/ الاقباط/ إيران / الخليج / امريكا / الغجر / النازيين الجدد / سواقين المشاريع .... هم السبب فى اللى بيحصل فى العالم من كوارث و دايماً عندك التبرير الممنطقى للى بيحصل

إذن ... أنت مدعو لكشف الغيوم حول مؤامرة حريق مجلس الشعب الاخيره

فى سابقه فريده من نوعها اعلنت مدونه لنتعد الطبيعى لجائزه قدرها كارت شحن خمسين جنيه حته واحده الى صاحب لأحسن مؤامرة تفسر ما الذى حدث فى الحريق الاخير

للتفاصيل برجاء قراءه إعلان المسابقه ... أخر ميعاد للتقديم هو 10 رمضان ... ياترى هو ده له دعوه بنصر أكتوبر و لا شكل اللى كاتب البلوج ده مسيحى و بيستهزء بالأديان ... أو يهودى بيقول أنهم إنتصروا الكلاب فى الحرب

المهم إن المسابقه موجوده و اللى عايز يقدم يبعت على التعليقات فى المدونه

"مرسى الزناتى إنهزم يا رجاله" هى العباره اللى جت على دماغى لتلخص حال الادب المصرى من وجهه نظرى.

--------------------

توطئه

البطل فى الادب الامريكى هو السوبرهيرو ... شخص لوحده قادر على التغيير و تحدى قوى الطبيعه حتى الخالق... فى الأدب اللاتينى البطل بيتغلب على مصاعب الحياه باللجوء الى الواقعيه السحريه اللى ممكن تعطى للحياه طعم ما.... البطل فى الادب الاوروبى فيلسوف يميل لتحليل الاشياء و التفكير العميق ... أما البطل العربى- المصرى للأسف بطل مهزوم ... الحياه طحناه و لا يستطيع مقاومه التيار و حتى لو حاول... عاده ما تنتهى القطعه الادبيه بمأساه مفجعه تذكرة و تذكر القراء أنه لا خاب من مشى داخل الحائط.

---------------------

تساؤل

ياترى ... هل الادب إنعكاس لظروف المجتمع إنعكاس أعمى و لا الأدب محرك للتغيير فى المجتمع !!!؟

---------------------

رأى

لو لاحظت معايا كده الادب المصرى هتلاقى إن كان عندنا أبطال فاتحين فى عز الانهزام العسكرى و الاحتلال الانجليزى زى حمزه عند يوسف إدريس و غيرة كثيرين و ...لكن و من 52 جالنا بطل يعوض كل الخيالات اللى كانت عندنا قبل الثورة (جمال عبد الناصر) كان عنده مشروع سواء إتفقت مع أساليبه و سياساته أو إختلفت ... بس كان عنده مشروع و كاريزما ... بس المشروع مكملش و البطل إنهزم ... و إنهزم البطل فى الروايه المصريه من ساعتها ... من أبطال خيرى شلبى لبهاء طاهر و نجيب محفوظ و صنع الله إبراهيم وصولاً لأبطال علاء الاسوانى و مكاوى سعيد.

العامل المشترك فى كل الابطال إنهم دول بيعانوا و بينسحقوا تحت عجلات المجتمع اللى مش مستعد يتجاوب معاهم ... و مع إستمرار اللون ده من الأدب المهزوم فى مصر ... مبقيناش بنحترم أى لون تانى من الادب و نعتبرة تهريج أو نكته هزليه نقراه بس فى إطار التعرف على الثقافات الأخرى ...مثلاً خد عندك نبيل فاروق اللى تؤكد الأرقام إنه من أكثر الكتّاب إنتشاراً فى أوساط الشباب و المراهقين فى فترة عدت و له إعتراف شعبى من الشباب بجوده اللى بيكتبه رغم إن ابطاله من النوع المنتصر ( أدهم و نور و فارس ) و لكن لم يعترف به الأدب المصرى (على مستوى النقاد) إلا مؤخراً جداً و بعد ما أبتدى يكتب فى الدستور و إنتشارة يقل ... من الاخر الادب المصرى مقدرش يحتفى بانواع أخرى من الادب المحرض على البطوله و الاقدام .

--------

مثال

رواية الخيميائى لباولو كويللو لاقت إعجاب عالمى فى كل حته فى أوروبا علشان الفلسفه اللى فيها و فى أمريكا علشان فيها بطل منتصر و فى أمريكا اللاتينيه علشان الواقعية السحريه اللى فيها و لكن عندنا الناس كرهتها ... كتير قالوا عنها إنها سطحيه و عامله زى كتب إبراهيم الفقى و ديل كارينجى ... الناس محبتهاش فى مصر علشان ملقيتش نفسها فيها... ملقيتش حد بيشيل زلط !!!

-------------------

تساؤل تانى

التساؤل اللى عندى علشان مطولش عليكم ... ياترى البطل المصرى إنهزم الاول و لا أبطالنا فى البلد اللى إنهزموا الاول و لا المجتمع كلُه هو اللى إنهزم؟

و ياترى لو إن كتابنا المصريين... رجعوا الامل و نصروا البطل المجتمع هينتصر و هيظهر عندنا أبطال و الا اساسا محدش هيحترم اللى مكتوب و الا كل اللى انا بقوله ده مجرد هجص ملوش دعوه !!!!!؟

الدليل على كده أن فى الشغل بتاعى (اللى هو فى 150 جمال عبد الناصر) أقنعتهم بالمدونات لغايه ما عملوا شويه مدونات

إشارة مرور

مدونه أشترك فيها مع أتنين معايا فى الشغل ... إحنا لما عملنا المدونه كان فى دماغى أنها تتكلم عن القضايا التنمويه و الأقتصاديه و المجتمعيه المصريه المختلفه ... بس الموضوع خرج من أيدى و أتحولت لمدونه فضفضة و كلام مختلف شويه ... هيتكلم فيها طوسون زى ما وعدنى عن نظريه كرسى الفرعون و نظريه تناكح الحضارات .. و هيتكلم فيها بوو عن الحاجات الغريبه الى شافها فى بلاد بره... تابعوا المدونه و حطوها على الفيد ريدر بتاعكم و يلا بينا

مدونه صباح صباح

مدونه تانيه عاملها بوجى ( المحاسب و زميلى فى الشغل ) لسه مش عارف هيتكلم عن أيه بس هو على السكه أنه يبقى مدون تمام... برضه حطوا بوجى على الفيد ريدر و تابعونا

مدونه حكى مش فارغ

و دى بقى ليها قصه ... فاكرين لما رحت العين السخنه و قابلت مجموعه من الشباب العربى ... عملنا هناك مبادره أسمها شبكه المدونون الشباب العرب ... و عملنالها ويب سايت و حركات ... بس بصراحه الموضوع فشل علشان المدونين أساسا ضد فكرة التجمع ( و انا نفسى واحد من دول) .... المهم قررنا بعد كده نعمل مدونه مش رسميه قوى زى اللى فاتت نجمع فيها مجموعه من المدونين العرب الجامدين و نتبنى فيها قضايا بتمس العالم العربى و نحاول نعمل تأثير ... المدونه بدايه طريق يارب ينجح ... المهم برضه تحطوا المدونه على الريدر و تتابعوها

----------------------

ملاحظه أخيره: انا بيجيللى فى الشغل متدربين بيساعدونى و انا ابتديت أشرط عليهم أنهم يعملوا مدونات ... فالقايمه لسه فيها مدونات جايه

ملاحظه بعد الاخيره : ده كان إعلان مجانى للمدونات اللى فاتت فياريت متنسوش تحطوهم فى الريدر الهى يكرمكم

أأأه كنت هنسى ... لو معندكش ريدر ممكن تشترك فى خدمه الجوجل ريدر

لو سألتنى انت ايه يا بهظ اللى ممكن يضايقك فى الدنيا أكتر حاجه هقولك التعصب و التعميم ... انك تاخد الناس على بعض كده تقول عليهم صفه ما فيكون الصعايده كلهم أغبيا او المسيحين كلم متأمرين على المسلمين.

انا مش قصدى أى إهانه ... بس الموضوع و ما فيه إن من يومين كده واحد صاحبى ورانى فيديو على اليوتيوب عن فرقه راب مصريه و فرقه راب سعوديه ... واحده منهم إسمها وكر العصفور ... و الارجح إنها المصريه .... الاتين نازلين شتيمه فى بعض ... و بصورة يعجز اللسان عن وصفها .... منتهى السفاله و العنصريه و الكراهيه.

الكراهيه بتولد كراهيه و عجله العنصريه لو ابتدت عمرها ما هتقف ... و الشباب الهايفه من الناحيتين مش واخدين بالهم باللى بيجرونوا عليه ... بكم السفاله المنتشر على اليوتيوب و كم الناس اللى عماله تتفرج هيبقى من المستحيل تقبل شاب سعودى و تحس انه اخوك ... و بدل ما تعمل ام حاجه مفيده فى حياتك ... هتضيع وقتك فى أذى للبشريه.

انا أعرف سعوديين زى الفل ... و خليجيين بيحبوا مصر .. بس بدل ما ننمى الحب ده و نستقبل اخوات ... زى الهبل بنربى أعداء من نفس الفصيله المقهوره عالميا ... نفس النوع الغبى اللى بيتكلم لغه واحده و دين واحد و عادات و تقاليد واحده و مفيش بينهم حاجه تربطهم و تبقى اللغه بحر بيفرق بينا بدل ما تبقى جسر نتواصل بيه ... هو ده الغباء بعينه.

أعزائى المدونون .. تضامنوا معى ضد الغباء المصرى السعودى ... تعالوا نقول لأخواتنا أن اللى بيشتموا دول ... مش بيعبروا عن رأينا ... تعالوا نقولهم أن اللى هم بيعملوه مش من مبائنا ... و إلا هنبقى إحنا زيهم ... شايفين الغلط و سامعينه و عارفين انه غلط و مع ذلك قعدنا ساكتبن

نداء الى كل العقلاء من الجانين ... تحابوا تراحموا و تعاونوا ... و إلا أكلتكم السلعوه.

فى تعريفات المعجم العربى الفعل بلبع مشتق من المصدر بلع أى أكل و تجشأ و أسم الفاعل منها هو بلبوع و هو الاكل المتجشإ و جمعها بلابيع ... و فى العاميه المصريه السكندريه يرمز للبلبع بأنه بيت الطعام المشوى ... و مرعى الكروش البارزه ... أرض اللذه و التجشأ.

-----------------------

كرشى بياكلنى يا جدعان ... بجد مش قادر ... ماشى بقالى يومين ببالونه قدامى...أصل انا بقالى يومين عمال أبلبع .... و بلبع ده للجاهل اللى ميعرفش أحد أهم معالم الأسكندريه الغذائيه تقترب شهرته من محمد أحمد و جاد و أبو ربيع و دهب و بندق... و يتميز عنهم بالشمول و الشموخ و تقديم مالذ و طاب من المشويات و المحمرات و ما زاد دهنها و سمن لحمها ... المطعم بيقدس اللحمه لدرجه أنه بيقدم الفراخ محشيه كفته ... شفتها دى قبل كده .. فرخه محشيه كفته.

----------------------

نحن نعتقد ان لكل شخص حق اساسي فى متعه التذوق وبالتالي فهو مسئول عن حمايه التراث الغذائى ، وكذا التقاليد والثقافة التي تجعل من هذا السرور ممكن. تقوم حركتنا على مفوم التغذيه الأيكولوجيه، إدراكاً منا بالعلاقه الوشيجه بين الطبق و الكوكب.

الاغذيه البطيئه، جيده و نظيفه و عادله . نحن نؤمن أنه لابد أن يكون للطعام الذى نأكله مذاق جيد، و يجب أن يتم إنتاجه بطرق نظيفه و غير ضارة بالبيئه أو برفاهية الحيوان أو صحتنا نحن و كذلك ينبغى أن يتلقى منتجى الاغذيه أجور عادله من أجل عملهم.

نحن نعتبر أنفسنا مشاركين فى عمليه الأنتاج ، و لسنا فقط مستهلكين ، لأنه بعلمنا لكيفيه إنتاج الغذاء و تشجيعنا له نصبح جزءا و شريكا فى عمليه الانتاج.

(المصدر) مترجم من موقع حركه slow food

--------------------

انا و خالد صاحبى أفتكسنا نموذج إقتصادى للوجبه فى بلبع .... فى قائمه مشتركه يتم تقسيمها على الحضور و قائمه منفصله لكل واحد

القائمه المشتركه تشمل

* طبق النشويات ده هو المحشى بأنواعه و الممبار

و بعد كده يجى مكان الطبق الرئيسى و اللى عاده هو نص فرخه (14 جنيه) أو ربع كباب و كفته (19 جنيه) أو ماشبه من انتركوت أو فيليه أو كفته بس .. كده

يعنى إجمالى اللى ممكن تدفعه فى بلبع حوالى 27 أو 28 جنيه ... يعنى 30 بالتبس .... شوف بقى أنت لو فى ماكدونالدز ممكن تدفع كام.

--------------------

خطتنا الدفاعيه يجب أن تبدأ من الطاوله عن طريق الغذاء البطئ ... لنعيد إكتشاف المذاق الاقليمى و المحلى للطعام و نقاوم التأثير المتزايد للطعام السريع.

باسم الانتاجيه ، تعمل أنماط الحياه السريعه لتغيير حقيقه ما نحن عليه كما أنها تهدد البيئه و المساحه الى نعيش فيها، لذا فالطعام البطئ هو الاجابه التقدميه الوحيده المطروحه على المائده.

و هذا هو المعنى الاصيل للثقافه، تنميه الذوق بدلاً من فرضه ، و أفضل وسيله لهذا هى التبادل الدولى للخبرات و المعرفه و المشاريع.

(المصدر) مترجم و بتصرف من منافستو حركه slow food

-------------------------

ده مش إعلان مدفوع الاجر ... بس السؤال اللى بيطرح نفسه، ليه مفيش للمحلات و البراندات المصريه المعتمده على الثقافه المصريه توكيلات أو فرنشايز يخليها تفتح فى حتت تانيه و بكثرة ... ليه مفيش بلبع فى القاهرة أو فى الصعيد ... البراندات المصريه اللى حاولت تعمل كده .. راحت قلدت البراندات الاجنبيه .. خد عندك مثلا مؤمن و كوك دور .. نموذج من ماكدونالدز و هارديز و كنتاكى و ما شابه... رؤيتى أن ممكن البرندات المصريه ممكن تفرقع مش بس محليا .. لا كمان دوليا ... و الموضوع مش بلبع و بس ... عندك محلات العصير زى مكه و القبيصى و خروب كليه الطب... المحلات دى لو بس عملت كود للماصفات اللى هى شغاله بيها و أبتدت تعمل فرنشايز لأسمها هتاكل شهد ... بلاش شهد .. هتاكل من ورا الموضوع ده طرب

-------------------------

كل بلبع

Eat Balba3

Essen Balba3

Comer Balba3

먹는Balba3

食べるBalba3

manger Balba3

φάει Balba3

بلبع .. كرشى يحبه

أحد إعلانات بلبع إنترناشونال

الفترة اللى فاتت قريت روايتين من روايات الخيال العلمى و اللى لأول مرة ميكونش نبيل فاروق هو اللى كاتبهم ... أهميه الروايتين دول تكمن فى أنهم جم فى وقت البلد فيه بتغلى ... و طبعا الواقع بيأثر على الكتاب دول حتى لو بيكتبوا خيال علمى.

الكتاب الأولانى هو " ثورة 2052 ... البدايه" للكاتب محمود عثمان ... الروايه مبدئيا جامده جدا و على حسب كلام العاملين فى مكتبه البلد من أكثر الروايات مبيعا .. و هى بتحكى قصه مهندس مصرى سنه 2023 و اللى هو من الطبقه فوق المتوسطه و اللى بيبتدى يكتشف الفساد فى البلد و مدى إنسحاق الطبقه الفقيره و اللى دايما شايفها من ورا زجاج سيارته .. من خلال إنه بيقابل "غريب" المصور و المدون على النت و اللى بيكشف حقيقه المعاناه اللى بيعشها المصريين.

الكتب التانى و هو روايه "يوتوبيا" لأحمد خالد توفيق ... و اللى هى أكثر تشاؤم و سوداويه و اللى بتاخد التفاوت الطبقى فى مصر لأعلى طبقاته من خلال ان ظهور طبقه من رجال الاعمال الدوليين اللى عايشين فى قريه يوتوبيا فى الساحل الشمالى و اللى حواليها حراسه من المارينز و باقى الشعب المصرى اللى فى الحضيض و أزاى بقى أن هوايات الشباب اليوتوبى هى أصطياد الحيوانات من الشعب المصرى .. القصه عن ولد يوتوبى و صاحبته خرجوا يصدادوا و أتزنقوا وسط الشعب و واحد مثقف حاول ينقذهم ... أنصحك برضه لو مقريتهاش أنك تقراها

المهم بقى و هو أزاى أن كتاب الخيال العلمى فى مصر شايفيين مستقبل مصر بالسوداويه دى كلها ... و بشكل مباشر.. من غير توريه... من إنحلال للطبقات و ظلم إجتماعى و ده إن كان بيدى مؤشر فهو بيشير لحجم السخط المصرى عامه و الرغبه القويه فى التغيير ( كلام معاد و كل اللى بيقراه عارفه) و لكن المهم بالنسبالى إن الكتابين أو غيرهم مقدموش تصور للتغيير ... أخدوا الأمور على إمتدادها و بدل ما يوروا المجتمع تأثير الأشتراك فى عمليه التغيير ... وروه تأثير غياب الأشتراك فيها و كأننا معندناش حلم أو هدف ... بمعنى ليه مفيش تصور لمصر و هى حلوه أو و هى متقدمه أو هى متحده مع الدول العربيه .... كل التصورات سلبيه عن أيه اللى هيحصل لو معملناش حاجه ... ليه مفيش كتابه محرضه إيجابيه ؟؟؟؟

على ناصيه حلمى لقيتها واقفه و بتسرح خطوط يومى .... حركت راسها بسهوله و و رسمت بضفايرها شجرة ... أخدت منها تفاحه خضرا و بين كفوفها دعكتها بقت حمرا أمريكانى و أديتهالى و أبتديت يومى.... الحياه من غير بنت تحسسك إنك اله رومانى .... وحشه.

--------------

انا أسف لكل اللى زارنى و ملقاش حاجه جديده .... معلش الحياه كانت رمادى اليومين اللى فاتوا

انا كنت أضربت عن الكتابه من فتره و لكن دلوقتى هضرب عن الحياه .... يااه أخيرا هصرخ براحتى ... هقف فى ميدان محطه مصر .... بعلو صوتى هصرخ

حرام عليكم بقى ... الرحمه يا كفره ... عايز أشارة مرور واحد سليمه ... الرحمه عايز تعليم عدل ... يا جدعان عايز أكل و انا مطمن ... عايز اشتغل من غير حكومه تعطلنى .... يارب توب علينا بقى

عاااااااااااااااااا عايز أتجوز ..... ااااااااااااااااه .... أعيش

الدعوه عامه للأسكندرانيه .... و المكان محطه مصر... و الميعاد 6 أبريل ... و تجنبوا الامن بأى شكل

أشفكم هناك